ಡಿಜೆ ಸ್ಪರ್ಧೆ ಮನೋರಂಜನೆಯಾಗಲಿ, ಮುಜುಗರದ ಕಾರಣವಾಗಬಾರದು
ಕಂಪ್ಲಿ: ಗಣೇಶೋತ್ಸವದ ಸಂದರ್ಭದಲ್ಲಿ ಆಯೋಜಿಸಲಾಗುತ್ತಿರುವ ಡಿಜೆ ಸ್ಪರ್ಧೆಗಳು ಕೆಲವೊಮ್ಮೆ ಮಂಡಳಿ-ಮಂಡಳಿಗಳ ಸದಸ್ಯರ ನಡುವೆ ಉದ್ವಿಗ್ನ ವಾತಾವರಣಕ್ಕೆ ಕಾರಣವಾಗುವ ಸಾಧ್ಯತೆ ಇದೆ ಎಂಬ ಆತಂಕ ಸಾರ್ವಜನಿಕ ವಲಯದಲ್ಲಿ ವ್ಯಕ್ತವಾಗುತ್ತಿದೆ. ಸ್ಪರ್ಧೆಗಳು ನಡೆಯಲಿ, ಆದರೆ ಅವು ಆರೋಗ್ಯಕರ ಸ್ಪರ್ಧೆಗಳಾಗಿರಬೇಕು ಹೊರತು ಜನರ ನಡುವೆ ಪ್ರಚೋದನೆ ಉಂಟುಮಾಡುವಂತಿರಬಾರದು ಎಂಬುದು ಸಾರ್ವಜನಿಕರ ಅಭಿಪ್ರಾಯವಾಗಿದೆ.
ಈ ಹಿಂದೆಯೇ ಬಳ್ಳಾರಿ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ (ಎಸ್ಪಿ) ಅವರು ಜಿಲ್ಲೆಯಾದ್ಯಂತ ಸಂಚಾರ ನಡೆಸಿ, ಡಿಜೆಗಳಿಗೆ ಅವಕಾಶವಿಲ್ಲ ಹಾಗೂ ಸಣ್ಣ ಪ್ರಮಾಣದ ಸ್ಪೀಕರ್ ಬಾಕ್ಸ್ಗಳನ್ನು ಮಾತ್ರ ಬಳಸಿಕೊಳ್ಳಬಹುದು ಎಂದು ಸೂಚನೆ ನೀಡಿದ್ದರು. ಆದಾಗ್ಯೂ, ಈ ಭಾಗದಲ್ಲಿ ಯಾವುದೇ ಕೋಮು ಗಲಭೆಗಳು ನಡೆಯದೇ ಸೌಹಾರ್ದಯುತ ವಾತಾವರಣದಲ್ಲಿ ಹಬ್ಬ ಆಚರಿಸಲಾಗುತ್ತಿರುವ ಹಿನ್ನೆಲೆಯಲ್ಲಿ ಕೆಲವು ಕಡೆ ಡಿಜೆಗಳು ಮತ್ತು ಡಿಜೆ ಸ್ಪರ್ಧೆಗಳು ನಡೆಯುತ್ತಿರುವುದು ಕಂಡುಬರುತ್ತಿದೆ.
ಡಿಜೆಗಳ ನಡುವೆ ಸ್ಪರ್ಧೆ ಇರಬಹುದು, ಡಿಜೆ ಆಪರೇಟರ್ಗಳ ನಡುವೆ ಪ್ರತಿಭಾ ಪ್ರದರ್ಶನವೂ ಇರಬಹುದು. ಆದರೆ ವೈಯಕ್ತಿಕ ಮಟ್ಟದ ಪೈಪೋಟಿ, ಅವಹೇಳನಕಾರಿ ಪದಗಳ ಬಳಕೆ ಹಾಗೂ ಸಾವಿರಾರು ಜನರ ಸಮ್ಮುಖದಲ್ಲಿ ಪರಸ್ಪರ ಟೀಕೆ-ಟಿಪ್ಪಣಿಗಳು ಸಮಾಜದಲ್ಲಿ ಅನಗತ್ಯ ಉದ್ವಿಗ್ನತೆ ಮತ್ತು ಗಲಭೆಯಂತಹ ಪರಿಸ್ಥಿತಿಗಳಿಗೆ ಪ್ರಚೋದನೆ ನೀಡುವ ಸಾಧ್ಯತೆ ಇದೆ.
ಡಿಜೆ ಸ್ಪರ್ಧೆಗಳು ಸಂಪೂರ್ಣವಾಗಿ ಬೇಡ ಎನ್ನುವುದು ಸಾರ್ವಜನಿಕರ ಅಭಿಪ್ರಾಯವಲ್ಲ. ಅವು ಮನರಂಜನೆಯ ಭಾಗವಾಗಿ ನಡೆಯಲಿ. ಸ್ಥಳದಲ್ಲಿ ನೆರೆದಿರುವ ಜನರು ಕುಣಿದು ಸಂಭ್ರಮಿಸುವ, ಭಾವನಾತ್ಮಕವಾಗಿ ಹಬ್ಬದ ಉತ್ಸಾಹವನ್ನು ಹೆಚ್ಚಿಸುವ ಹಾಗೂ ಸಾಂಸ್ಕೃತಿಕ ಮನೋರಂಜನೆ ನೀಡುವ ಕಾರ್ಯಕ್ರಮಗಳಾಗಿರಲಿ.
ಆದರೆ ಸಾರ್ವಜನಿಕರಿಗೆ ಮುಜುಗರ ಉಂಟುಮಾಡುವ, ಗುಂಪುಗಳ ನಡುವೆ ಭಿನ್ನಾಭಿಪ್ರಾಯ ಹೆಚ್ಚಿಸುವ ಅಥವಾ ಸಮಾಜದ ಶಾಂತಿ-ಸೌಹಾರ್ದತೆಗೆ ಧಕ್ಕೆಯಾಗುವ ರೀತಿಯ ಸ್ಪರ್ಧೆಗಳು ನಡೆಯಬಾರದು ಎಂಬುದು ಸಾರ್ವಜನಿಕರ ಆಶಯವಾಗಿದೆ.
"ಡಿಜೆ ಸ್ಪರ್ಧೆ ಇರಲಿ... ಆದರೆ ಅದು ಮನರಂಜನೆಗಾಗಿ ಮಾತ್ರ ಇರಲಿ; ಸೌಹಾರ್ದತೆ ಉಳಿಯಲಿ."
